hofgardur

Vorferð í Skaftafell

Sat, 30 May 2026 20:44:06 GMT

Gönguferð að Svarta fossi, Lambhagi og grill í skaftafelli

Ferðin hófst á því að ganga upp að Svarta fossi, allur skólinn með nemendur frá fyrsta upp í sjöunda bekk. Leikskóladrengir á aldrinum þriggja til sex ára létu sig ekki muna um að labba þetta upp á eigin spýtur. Eftir göngu að Svarta fossi var ferðinni haldið áfram í Lambhaga þar sem við hittum okkar ástkæru Beötu, eða Betty. Eftir að hafa nært okkur og leikið í Lambhaga var ferðinni heitið á leikvöllinn í Skaftafelli þar sem við grilluðum pylsur og lékum okkur fram að heimferð.

Mjög góður dagur!

Árleg ferð í Ingólfshöfða 22. maí 2026

Sat, 30 May 2026 20:40:48 GMT

Matthildur Þorsteinsdóttir var leiðsögumaður

Matthildur Þorsteinsdóttir gekk með nemendahópnum um svæðið. Við sáum lunda og mældum lundaholu með staf.
Matta sýndi okkur hvernig maður ber sig að við að veiða lunda í háf.
Við sáum líka skúm. Það er alltaf upplifun að koma út í Ingólfshöfða og sjá lundann að störfum, Matta lét okkur syngja fyrir lundann, hún sagði að hann væri svo forvitinn og myndi ganga á hljóðið.

Að sjálfsögðu voru einhverjir sem renndu niður sandbrekkuna, sem hafði hækkað töluvert síðan við vorum í höfðanum fyrir ári síðan.

Hjóladagar í maí

Sat, 30 May 2026 20:37:43 GMT

Löggu og bófa eða kappakstur á reiðhjóli

Allan maímánuð eru reiðhjól nemenda í skólanum. Þann tíma er innkeyrslunni inn á bílaplanið lokað og engir bílar til að trufla flæðið. þá er heldur betur hægt að hjóla frjálst og hafa gaman af. Það eru ýmsir eltingaleikir, löggur og bófar og allskonar kappaksturslið sem taka stjórn.

Eins höfum við í september, í stað þess að hjóla í skólann, höfum við hjólað í skólanum

Plokkbingó

Mon, 27 Apr 2026 15:05:19 GMT

Nemendur leikskólans Lambhaga og grunnskólans í Hofgarði tóku þátt í að plokka í dag. Afraksturinn var heldur betur glæsilegur. Nemendur höfðu fengið bingóspjöld svokallað plokk-bingó, það náði enginn að klára spjaldið en margir voru mjög nálægt því.
Það var hún Sandra á bókasafninu sem deildi með okkur plokkbingóspjaldinu.

Uppskeruhátíð nemenda 2026

Fri, 17 Apr 2026 18:47:16 GMT

Sýnishorn af verkum nemenda

16. apríl 2026 var uppskeruhátíð nemenda í Leik- og grunnskólanum í Hofgarði.

Nemendur sýndu afrakstur starfsins í vetur.
Sophia og Lovísa hafa verið með tónmennt sameiginlega hjá leikskólanum og grunnskólanum þar sem kenndir eru leikir með takt og tónlist. Á uppskeruhátíðinni fluttu börnin lagið ,,Ég elska blómin" þar sem er bæði taktur og söngur með hreyfingum.

Eldri börnin í þriðja til sjöunda bekk spiluðu á píanó, en Sophia hefur kennt tónfræði og leiðbeint á píanó síðastliðna vetur.

Sunneva sem alla jafna stýrir félagsmiðstöð skólans tók að sér að leikstýra Ávaxtakörfunni. Leikritið var stytt og staðfært fyrir okkar litla hóp og tókst afar vel til. Sunneva og Áróra sáu um leikmynd og Áróra tók að sér búningahönnun.

Leikskóladrengir sýndu verk sem þeir hafa unnið með Lovísu og Söru í vetur, þeir eru búnir að læra flesta stafi og hafa unnið mikið með námsefnið Lubbi finnur málbein. Þeir bjuggu til dæmis til stafi úr trjágreinum sem hafa brotnað af í rokinu undanfarið og vöfðu með garni.

Að vanda var hlaðborð að hætti hússins fyrir gesti í lok sýningar í boði starfsmanna og foreldra.

Starfsmenn eru þakklátir fyrir góðar viðtökur og frábæra mætingu, það er gaman þegar svo margir sýna starfinu áhuga.

Leikskólabyrjun og skólasetning grunnskóla

Mon, 11 Aug 2025 16:00:57 GMT

Leikskóli

Leikskóli hefst aftur eftir sumarfrí mánudag 18. ágúst 2025. Við hlökkum til að taka á móti ykkur!

Grunnskóli

Skólasetning grunnskóla er miðvikudag 20. ágúst kl. 11

Kennsla hefst samkvæmt stundarskrá fimmtudag 21. ágúst.